24x7 Online News in Paite-Zomi, Manipur, Mizoram, North East India
Powered By The Christian Gift

The Lamka Times

Monday, December 20, 2010

Dec 13 ni a Yaiphakol khokiang a misi kimu pen thei hita.

Lamka, Dec 20: Yaiphakol khokiang a buhpawl kawm a vuahtang numei sisa muhkhiak a om pen zan Pathianni Dec19,2010 in theih suah in omta hi. Misi pen Hatkholhing 56 w/o Songzamang Guite, Takvom khua hia theichet in om hi. Apasal Songzamang in a genna ah ngal ka man a, huai pen ka sungte kiang ah Pusa pe ding in Dec11,2010 in ka zi ka sawl a, amah leng nitak lam in kuan khia a, Gangpimual a ka tate inluah a om te kiang a tomkha bang in hiai zoh in Misao Lhavom khua a pu te kiang zuan in paisuk chi hi. A ban a genna Gangpimual aka tate camp ah ana tel ziak un kimu lou ua, amau chabi leng tawi chi hi. A ban a gen zelna ah a zing chiang Dec12 a hongtung pha dingin ka koih a, hong tun louh takin Gangpimual a ka tate kiang ahi keileh apu te kiang a hong om hiding in ka gingta chi hi. A hong tung kik louhna a sawt simtak in kei leng va kan ding in ka kuan a, Gangpimual a naute kiang a ka kan leh ka kimu kha kei uh chi ua, tua zoh in Misao Lhavon a apute kiang a kava kan leh hong pailou chi in honna dawng uh chi hi. Amah leng bei dong a kisak tak in Gangpimual ZYA te kiang ah thil omdan theisak a, ZYA te makiah in Yaiphakol kimlak va en ua, Yaiphakol phakma zek a culvert nuai ah avante va mu uhi. A van muhte uh ahileh apuan ten 1, nam 1, sapmalta, nylone bag 1, bal tamlou, a slipper buhlai leh Inn chabi ban ah sahou bem 1 mu a, a seng puak pen mu zoulou chi hi. Hiai misi pen a kitheih suah ma in CCpur Joint Women Org in Dist. Magistrate ah ni 2/3 hiam morque a koih lai ding ngen ua, himah leh Misi luang pen Kiginni Dec18,2010 in CCpur Police ten haltum uhi. Hatkholhing sihna toh kisai in CCpur Joint Women Org in tuzingkal dak 7 in KKL Complex HQ veng ah CCpur dist sung a philantrophic org teng toh emergency meeting nei ua, tua zoh in Joint Women pawl in CDSU Administrative building ah CDSU heutu te toh meeting nei uhi. Misi toh kisai in Joint Women pawl in naktak in pan lak sawm ua, hongtung ding Dec22,2010 sunma dak 11 in Joint Women org saina in New Bazar ah condolence meeting om ding a, huai akipan in numei te bangmah lou leh ganhing bang mai koih a om pen deihlou lahna in DC office tan lampi suihna om ding a, DC/CCpur kiang ah misi toh kisai memorundum piak sawm uhi.

No comments:

This Day in History