Kintak a PDS puah thak poimoh ahi: ZEPADA

Lamka: Mautaam kial panpihna lohchingtak a hawmzoh ahihna toh kisai in
ZEPADA in mautaam kial douna a panlakna neikha teng kiang ah kipahthu
genna thusuah bawl uhi.

ZEPADA in a thusuah ah MHA nuai a National Disaster Management
Division, Ministry of DoNER apat Inter-Ministerial Team, Churachandpur
district a Minister/MLA-te leh Outer Manipur a MP lui Mani Charenamei,
Manipur sorkar leh adiak a Dept. of Relief & Disaster Management,
District Administration leh a kisaipih department, BDO/SDO tengteng
leh a staff te uh, MHJU tel a Manipur a media lamte, CDSU, COMFA leh
kial panpihna thohte, MZI, ZAA, HYA, KKL, YMA (Manipur), ZYA, Aid Zomi
Japan etc. ban ah mimal phatuamngaite tung ah kipahthu gen uhi.
Mautaam kial douna dia sum sehkhiak a om tengteng a kim sipsip a
Churachandpur district hong lut a, kua mah a kigolh om hetlou a amu
dingte kimtak a mu ahihdan uh leh hiai bang panpihna lohchingtak a
kihawm pen phualpi senna scheme dang khempeuh in leng phalou ding
hidan in hiai tungtang chiamteh tham ching chiin ZEPADA in taklang hi.

Himahleh, mautaam kial in maban kum 2/3 tan ban daih lai ding ahihdan
taklang kawm in, Dist Adminstration in 2008-09 a louma kisiatdan
pansan a proposal thak thehlut ahihna ah, hun paisa a mautaam kial
thuakte panpihn nasemte'n nasazaw sem a panlak a hon sutzop lai uh
lamet thu ZEPADA in taklang hi.

Tuabang kawm kal ah mautaam kial panpihna hawm zoh hita ahihna ah,
tulel in PDS pen puahthak dia panlak poimoh mahmah ahihdan ZEPADA in
gen. Mipi gilkialte a dia PDS item kiningching a om theihna dia
Manipur tanggam bial a gam neilou singtangmite (landless tribals)
tengteng BPL category a lalut di'n ZEPADA in state sorkar ngen a,
tulel a huchibang gam neilou milip lak a 40% chauh in PDS tungtawn a
hamphatna ngah uh hi'n taklang hi. Huai banah, BPL innkuan teng kiang
a anntang kg.25 chiat, kg.1 cheng 3 a piak ding UPA sorkar in a sawm
pen sepsuah ahihtheihna dia kintak a ganlak poimoh ahihdan leng ZEPADA
in taklang hi.