NE te' ading in time zone tuam ngetsawm

Guwahati, July 10: India malsuahbial a teng mi minthang tuamtuam kipawl khawm in Central government ah North-East state a di tuam liauliau in time zone ngetsawm uh chih thu om hi. Film maker Jahnu Barua in agendan in, DoNER tungtawn in time zone tuam nget hiding a, lawhchin ngei kinephuai chi hi. Laisiam (academician) tamtak ban ah, journalists, personalities leh mi tuamtuam Guwahati ah kimukhawm in India malsuah bial a state teng phaksuak sawm ua, huai ah mipite' souleng dopsawm uh hi'n gen ua, India (vaigam) khawpi tuamtuam te dak (sana) sang a India malsuah bialte ah minute 90 a baihsak zawk ding chi uhi. Thusuak in a gendan in, vaigam a khawpi om te sang in minute 90 val in nisuak baihzaw a, etsakna ding in, Arunachal Pradesh ah zinglam dak 4.28 am in nisuak a, himahleh, Mumbai ah 6.05 am in suak pan chi uhi. Tuamah bang in, NE ah nitum baihzaw a, Arunachal ah nitak dak 6.13 pm a ni a tumlai in Mumbai ah 7.20 pm in nitum pan leuleu chi'n Geography teacher Anirban Das gen a, region geo-location ziak ahi chi hi. Tu in social thinker kipawlkhawm mi tamtak te'n NE a Dan siam tuamtuam thuzak lel in a zawhsiang chiang un DoNER ministry tungtawn in phuding uh ahihdan gen uhi. Amau agendan un, zinglam dak 4 apan 10 am kikal bangchi leh manphatak a zat theih ding hiam chih ngimna hizaw chi ua, khawvak tung apan office kai hun ding dak 10 ngak charchar pen bawl lamdang theihdiam chih lametna leng om chi uhi. Daylight Saving Time (DST) kichi gam tamtak in ana zang a, India sang in Bangladesh sana minute 90 in baihzaw a, huchi ahihleh, India malsuah bial a te a Bangladesh sang a ni suak baihzaw lai ahihman in banghiam khen danglam ngai om himhim ahi chi uhi.